ފާއިތުވި ދެތިން އަހަރު، ކުޑަކުދިންނަށް ޖިންސީ ގޯނާކުރާ މައްސަލަތައް ރިޕޯޓްކުރާ މިންވަރު އަވަސް: ޕީޖީ

މިދިޔަ ދެ ތިން އަހަރު ތެރޭގައި ކުޑަކުދިންނަށް ޖިންސީ ގޯނާކުރާ މައްސަލަތައް ރިޕޯޓްކުރާ ގޮތް އަވަސްކަން ފާހަގަކުރެވޭކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

ބުދަ ދުވަހު ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގައި ވާހަކަދައްކަވަމުން ޕީޖީ ޝަމީމް ވިދާޅުވީ، މައްސަލަތައް ރިޕޯޓްކުރާ މިންވަރު އަވަސްވުމަކީ މައްސަލަތަކުގެ ހެކި ލިބުމަށް މަގުފަހިވާ ކަމެއް ކަަމަށެވެ. އަދި އަވަހަށް މައްސަލަތައް ރިޕޯޓްކުރާ ނިސްބަތް އަވަސްވެފައިވަނީ އާއްމުންގެ ހޭލުންތެރިކަން އިތުރުވުމުންކަމަށް ގަބޫލުފުޅުކުރައްވާ ކަމަށްވެސް ޕީޖީ ވަނީ ވިދާޅުވެފައެވެ. އަދި ހެކި ހޯދުމުގެ މަސައްކަތްވެސް ކުރިއަށްވުރެ ރަނގަޅުވެ، ދައުވާކުރާ މައްސަލަތައް ސާބިތުވާ ނިސްބަތް އިތުރުވާކަން އޭނާ ވަނީ ފާހަގަކުރައްވާފައެވެ.

ޝަމީމް ވަނީ 2010ން ފެށިގެން 2020ށް ތަފާސްހިސާބުތައް އަޅައިކިޔާއިރު ދައުވާކުރާ މައްސަލަތަކުގެ ތެރެއިން ސާބިތުވާ މައްސަލަތަކުގެ ނިސްބަތް އިތުރުވެފައިވާކަން ފާހަގަކުރައްވާފައެވެ. އަދި ކުރިއަށްވުރެ ފުލުހުންނަށް އާއްމުން ކުރާ އިތުބާރުވެސް އިތުރުވެފައިވާކަން ވަނީ ފާހަގަކުރައްވާފައެވެ.

މީގެ އިތުރުން ޝަމީމް ވަނީ މައްސަލަތައް ކުރިއަށް ގެންދިއުމަށާއި އަވަސްކުރުމަށް ޕީޖީ އޮފީހަށް ދިމާވާ ދަތިތަކުގެ ތަފްސީލް ހިއްސާކުރައްވާފައެވެ. އެގޮތުން ކުށް ބަޔާންކުރާ މާއްދާގެ ތަފާތު ގާނޫނުތައް ހުރުމުގެ ސަބަބުން މައްސަލަތައް ކުރިއަށްގެންދާނީ ކޮން ގާނޫނެއްގެ ދަށުންކަން ދެނެގަތުމަށް ދަތިތަކާ ދިމާވާކަމަށް ޝަމީމް ވިދާޅުވިއެވެ. އެހެންކަމުން ބޮޑެތި ޖިނާއީ ކުށްތައް ފިޔަވައި އެހެން ކުށްތައް ގާނޫނުލް އުގޫބާތުގެ ދަށުން ބަޔާންކުރާ ގޮތަށް ހަމަޖައްސައިދިނުމަށް އެޓަރނީ ޖެނެރަލްއަށް ދަންނަވާފައިވާކަަމަށާއި، އެކަމާގުޅޭ މައްސަލައެއް މަޖިލީހަށްވެސް ހުށަހަޅުއްވާފައިވާނެކަމަށް ވިދާޅުވިއެވެ.