މިފްކޯގެ ބޯޓަކުން ބަނގުރާ އަތުލައިގެންފި
25 ޖޫން 2022 | ހޮނިހިރު 03:02ކަސްޓަމްސް އިން ބުނި ގޮތުގައި ބަނގުރާ ފެނިފައިވަނީ ޖަޒީރާ ރީފަރ އިން
މިފްކޯއިން އަލަށް ގެނައި ސްޓޯރޭޖް ރީފަރ ކެރިއަރ
ބެންކޮކްއިން ރާއްޖެއަށް އައި މިފްކޯގެ ބޯޓަކުން ބަނގުރަލާއި އެހެނިގެން މަނާ ބައެއް ތަކެތި އަތުލައިގެންފައިވާ ކަމަށް މޯލްޑިވްސް ކަސްޓަމްސް ސަރވިސަސް އިން ބުނެފިއެވެ.
ކަސްޓަމްސް އިން ބުނީ ކަނޑުމަގުން ރާއްޖެ އައި ބޯޓަކުން ގިނަ އަދަދެއްގެ ބަނގުރަލާއި އެހެނިހެން މަނާތަކެތި އަތުލި ކަމަށެވެ. އެ ބޯޓަކީ 22 ޖޫން 2022 ގައި ބެންކޮކްއިން ފުރައިގެން ގއ. ކޫއްޑޫއަށް ދިޔަ އެމްވީ ޖަޒީރާ ރީފަރ ކަމަށް ވެސް އެ އިދާރާއިން ބުންޏެވެ. އެމްވީ ޖަޒީރާ ރީފަރ އަކީ މިފްކޯއިން މަސް އެކްސްޕޯޓު ކުރުމުގައި ބޭނުން ކުރަމުން އަންނަ ބޯޓެކެވެ.
ކަސްޓަމްސް އިން އެ ބޯޓު ބަލައި ފާސްކުރީ ގަވާއިދާ ޚިލާފު އެއްޗެއް ހުރިމަކަމަށް އިންޓެލިޖެންސްއަށް މައުލުމާތު ލިބިގެންނެވެ. އެ ބޯޓު ފާސް ކޮށްފައިވަނީ ކަސްޓަމްސް އާއި ސިފައިން އަދި ފުލުހުން ގުޅިގެންނެވެ. ބޯޓު ފާސްކުރުމުގެ ތެރޭގައި ބޯޓުން ބަނގުރަލާއި އެހެނިހެން މަނާތަކެތި ފެނިފައިވާ ކަމަށް ވެސް ކަސްޓަމްސް އިން ބުންޏެވެ.
އެ އިދާރާއިން ބަނގުރަލުގެ އިތުރުން އެ ބޯޓުން ފެނުނު މަނާ ތަކެތީގެ ތަފްސީލެއް ނުދެއެވެ.
ކަސްޓަމްސް އިން ބުނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށާއި ބޯޓުން ފެނުނު ބަނގުރާ ފުލުހުންނާ މިހާރު ހަވާލު ކުރެވިފައިވާ ކަމަށެވެ.
