ރައްޔިތުންގެ މަޖިލީހުގެ މެޖޯރިޓީ ލީޑަރ އަހުމަދު ނިހާނު ހުސައިން މަނިކާއި މައިނޯރިޓީ ލީޑަރ އިބްރާހީމް މުހައްމަދު ސޯލިހު (އިބޫ)ގެ އިތުރުން މަޖިލީހުގެ ގިނަ މެމްބަރުންތަކެއް އަވައްޓެރި ސްރީލަންކާއަށް ވަޑައިގެން އެބައުޅުއްވަ އެވެ.

ނިހާނު ސްރީލަންކާއަށް ވަޑައިގެންނެވިތާ މިހާރު ދެތިން ދުވަސް ވެފައިވާއިރު، އިބޫ ލަންކާއަށް ވަޑައިގެންނެވީ ހުކުރު ދުވަހުގެ ރޭގެ ވަގުތެއްގަ އެވެ.

ޕީޕީއެމް ރައީސް ޔާމީންގެ ފެކްޝަނުން ބުނެފައިވާ ގޮތުގައި ނިހާނާއެކު އެޕާޓީގެ މަޖިލީހުގެ އިސްވެރިން ވަޑައިގެންނެވީ އަންނަ ރިޔާސީ އިންތިހާބުގެ  ކެމްޕެއިންގެ ކަމެއްގައެވެ.

ނަމަވެސް އެމްޑީޕީގެ ޕާލަމެންޓްރީގް ގްރޫޕްގެ ލީޑަރު އިބޫ އާއި މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު ލަންކާއަށް ވަޑައިގެންނެވީ ކޮން ކަމަކަށް ކަމެއް އެނގިފައެއް ނުވެއެވެ.

ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތް ކަމަށް 45 މެމްބަރުންގެ ސޮޔާއެކު މަޖިލީހަށް ހުށަހަޅާފައި ވަނިކޮށް، މަޖިލީހުގެ ގިނަ މެމްބަރުތަކެއް ވަނީ އަވައްޓެރި ސްރީލަންކާއަށް ވަޑައިގަންނަވާފަ އެވެ.

މީގެ އިތުރުން ކުރީގެ ރައީސް މުހައްމަދު ނަޝީދު ވެސް މިވަގުތު ހުންނެވީ ލަންކާގަ އެވެ.

މަސީހުގެ އިތުބާރުނެތް ކަމަށް 45 މެމްބަރަކު ސޮއި ކުރައްވާފައިވާއިރު، އޭގެތެރޭގައި ޕީޕީއެމްގެ 11 މެމްބަރަކު ހިމެނި ވަޑައިގަންނަވަ އެވެ. އެކަމާ ގުޅިގެން ސަރުކާރަށް ނިސްބަތްވާ މެމްބަރުންނާއި މިނިސްޓަރުން ގެންދަވަނީ އަލުން އަނބުރާ އެމެންބަރުން ގެންނެވުމުގެ މަސައްކަތް ކުރައްވަމުންނެވެ.