22 ސެޕްޓެންބަރ 2018 | ހޮނިހިރު | 03 އަތަ
12 މުޙައްރަމް 1439
ފަތިސް 04:43
އިރުއަރާ 05:54
މެންދުރު 12:03
އަސްރު 15:07
މަޣްރިބް 18:04
އިޝާ 19:15

ރިޔާސީ އިންތިޚާބު 2018

ތަރައްޤީއަކީ ރައީސް ޔާމީންގެ ހަރުމުދަލެއް ނޫން!

  • ކުދިކުދި ކަންކަންވެސް ތަރައްޤީގެ ގޮތުގައި ދައްކަން ސަރުކާރުން މަސައްކަތްކުރޭ
  • ގިނަ ބަޔަކު ތަރައްޤީއޭ ބުނެ ދައްކާ ވާހަކައާއިމެދު ސުވާލު އުފައްދާ
މިއުވާން މުހައްމަދު | Miuvaan

| 18 އޯގަސްޓު 2018 | ހޮނިހިރު 18:01 | |

މަގުބޫލް

  1. މުލީއާގެއަށް ބޮޑު ޕިކަޕެއްގައި ގިނަ ފޮށިތަކެއް ދަންވަރު ވައްދައިފި
  2. ހިޔާ ފްލެޓަށް ކުރިމަތިލުމުގެ މުއްދަތު ހަމަނުވަނީސް ފްލެޓް ލިބުނުކަމުގެ ލިޔުން ދޫކުރަން ފަށައިފި!
  3. ބައެއް ފަހަރު އަމިއްލަ ނަފްސު ދެކެ ވެސް ރުޅިއާދޭ: ރައީސް ޔާމީން
  4. ބޭރުގެ ނޫސްވެރިންް އަދި އޮބްޒަރވަރުންނަށް ވިސާ ނުދިން!
  5. ކާނަލް ނާޒިމް ފްރޭމްކޮށްފައިވާ ކަމަށް ޝަހީމް ވިދާޅުވި: ޝެއިޚް އިލްޔާސް
  6. މާފުށި ކައުންސިލްގެ ނައިބު ރައީސާ ނަޝީދާ އެމްޑީޕީއަށް ސޮއިކުރައްވައިފި
  7. ހަޔާތުގައި އިލްޔާސް އިބޫއާ ބައްދަލުވި ފުރަތަމަ ފަހަރު: އިބޫ އިހްތިޔާރު ކުރެވުނީ ހިކުމަތަކަށް!
  8. އިބޫއަށް ތާއިދުކޮށް ގިނަ ޓެކްސީ ޑްރައިވަރުތަކެއް ބްރިޖްމަތީގައި ޓެކްސީ ދުއްވައިފި


ރައީސް ޔާމީން އަބްދުލްޤައްޔޫމް -- ރައީސް އޮފީސް

ރައީސް ޔާމީން ވެރިކަމަށް ވަޑައިގެންނެވީ އިޤްތިޞާދީ މާމޮޅު މާހިރެއްކަމަށް އެމަނިކުފާނު ސިފަކޮށް ކުރެވުނު ކެމްޕެއިނެއްގެ ތެރެއިންނެވެ. އެހެންނަމަވެސް އެމަނިކުފާނަށް ވެރިކަން ލިބިވަޑައިގަތީ އެބުނާ 'އިޤްތިޞާދީ މާހިރަކަށް' އެމަނިކުފާނު ވެވަޑައިގަތުމުންނެއް ނޫނެވެ. ރައީސް މައުމޫނާއި ޤާސިމް އިބްރާހިމް އެމަނިކުފާނަށް ވޯޓު ދޭން ރައްޔިތުންގެ ކިބައިން އެދިވަޑައިގަތުމުން ރައްޔިތުން ވޯޓު ދިނީއެވެ. އެހެންނަމަވެސް އެދެބޭފުޅުންނާއިމެދު ރައީސް ޔާމީން ކަންތައް ކުރެއްވި ގޮތުން ރައްޔިތުންގެ ގިނަ ބަޔަކު ޚިޔާލު ބަދަލުވެއްޖެކަމަށް ރައްޔިތުން ދަނީ ބުނަމުންނެވެ. 

އިޤްތިޞާދީ މާހިރެއްކަމަށް ވިދާޅުވެ ރައީސް ޔާމީން ވެރިކަމަށް ކެމްޕެއިން ކުރެއްވިނަމަވެސް، އިޤްތިޞާދީ ގޮތުން އެމަނިކުފާނަށް ކުރެއްވުނު މާބޮޑު ކަމެއް ނެތެވެ. ޤައުމުގެ އިޤްތިޞާދަށް އާމްދަނީ އިތުރުވާނެ އައު ކަމެއް ނުކުރެވުނެވެ. ޓެކްސްގެ ނިޒާމަށް އިސްލާހީ ބަދަލުތަކެއް ނުގެނެވުނުތަނުގައި ދައުލަތުގެ ޓެކްސް އިދާރާ ފެނުނީ އާއްމުންނާއި ވިޔަފާރިވެރިންގެ ނަފުރަތު އަމާޒުވި ތަނަކަށެވެ. ދަރަނި އިންތިހާއަށް އުފުލިގެން ދިޔައިރު، ބައިނަލްއަޤްވާމީ މާލީ އިދާރާތަކުން ރާއްޖެއަށް ލޯނެއް ދޭން ފަސްޖެހޭ ހިސާބަށް ހިނގައްޖެއެވެ. ބޮޑެތި ލޯނުތަކެއް ނަގައިގެން، ކޮރަޕްޝަންގެ އެތައް އަމަލެއް ހިންގިކަމަށް ތުހުމަތުކުރެވޭ މުއާމަލާތްތަކެއްގެ ތެރެއިން އިމާރާތްތަކެއް އެޅުން ފިޔަވައި ކުރެއްވުނު މާބޮޑު ކަމެއް ނެތެވެ. ޗައިނާގެ ރައީސް ޝީ ޖިންގްޕިންގްގެ ބެލްޓް އެންޑް ރޯޑް އިނީޝިއޭޓިވް ޕްރޮޖެކްޓްގެ ތެރެއިން ޗައިނާ ސަރުކާރުގެ ބޭނުމަށް ދިވެހި ސަރުކާރަށް ފޯރުކޮށްދޭ އެހީއަކީ އެއީ ރައީސް ޔާމީންގެ މޮޅުކަމުން ލިބޭ އެހީއެއް ނޫންކަން މިއަދު ރައްޔިތުންނަށް އެނގިއްޖެއެވެ.

ރައްޔިތުންނަށް ފޯރުކޮށްދޭން ޖެހޭ އަސާސީ ޚިދުމަތްތައް ފޯރުކޮށްދިނުމަކީ ތަރައްޤީ ނޫންކަން މިއަދު އެންމެންނަށްވެސް އެނގެއެވެ. ފެނާއި ނަރުދަމާ އަކީ ސަރުކާރުން ރައްޔިތުންނަށް ފޯރުކޮށްދިނުން ލާޒިމްކުރާ ޚިދުމަތްތަކެވެ. އެޚިދުމަތްތައް ފޯރުކޮށްދިނުމަކީ އެއީ ރައީސް ޔާމީންގެ ހެޔޮފުޅުކަމުން ކޮށްދެއްވަން ޖެހޭ ކަންކަމެއް ނޫނެވެ.

އެހެންކަމުން 2018 ވަނަ އަހަރުގެ އިންތިޚާބަށް ރައީސް ޔާމީން ނިކުމެވަޑައިގަތުމަށް 'އިޤްތިޞާދު' ނޫން އެހެން ބަހެއް ބޭނުންވެއްޖެއެވެ. ރައީސް ޔާމީން އަރިހުގައި ތިއްބަވާ ބޭފުޅުންނަށް އެންމެ ކަމުދިޔަ ބަހެއްކަމަށް ފެނުނީ "ތަރައްޤީ"އެވެ. އެހާ ހިސާބުން ކޮންމެ ކަމެއްގެ ތެރެއަށް 'ތަރައްޤީ'، މިބަސް ބޭނުންކުރަން ފެށިއެވެ. ސްކޫލެއްގެ ސިޑީގެ ރެއިލިން ބަދަލުކުރުމަށްވެސް ތަރައްޤީއޭ ކިޔަން ފެށިއެވެ. މިސްކިތުގެ ވަށާ ފާރު ރޭނުމަށްވެސް، ދަނޑުގެ ވަށައިގެން ދާޖެހުމަށްވެސް ތަރައްޤީއޭ ކިޔަން ފެށިއެވެ. ހޮސްޕިޓަލުގެ އެމްބިއުލާންސް ބާއްވާތަން ހިޔާކުރުމަކީވެސް ތަރައްޤީކަމުގައި ރައްޔިތުންނަށް ވިސްނައިދިނުމަށް މަސައްކަތްކުރިއެވެ. 

ސަރުކާރުގެ ތަރައްޤީގެ ވިސްނުމަކީ ދިވެހި ރައްޔިތު މީހާއަށް ހައްޤު މިންވަރަކީ ސަރުކާރުން އެފޯރުކޮށްދޭ މިންވަރުކަމަށް ރައްޔިތުންނަށް ވިސްނައިދިނުމެވެ. އެހެންނަމަވެސް ދިވެހި ރައްޔިތުންނަށް ހައްޤު މިންވަރަކީ އެއީ ނޫންކަން ދިވެހި ގިނަ ރައްޔިތުން ޤަބޫލުކުރެއެވެ. ރަށުގައި ހުންނަ ކުޑަކުޑަ އައިޝާއަށް ހައްޤު މިންވަރު ކަނޑައަޅަން ޖެހޭނީ މާލޭގައި ހުންނަ 'މެޑަމް އޮފީހުން' ނޫންކަމަށް އެކުޑަކުޑަ އައިޝާވެސް ޤަބޫލު ކުރެއެވެ.

ތަރައްޤީ، މިބަހަކީ ރައީސް ޔާމީންގެ ހަރު މުދަލެއްކަން ދައްކަން ސަރުކާރުން ކިތަންމެ ވަރަކަށް މަސައްކަތް ކުރިޔަސް ހަޤީޤަތް ބަދަލެއް ނުވާނެއެވެ. އެބަސް މޮނޮޕޮލައިޒް ކުރާހާ މިންވަރަކަށް ރައީސް ޔާމީނަށް މިޤައުމަށް ތަރައްޤީއެއް ނުގެނެވުނެވެ. ޑުބާއީގެ އަމީރު ޝައިޚް މުޙައްމަދު ބުން ރާޝިދު އަލްމަޚްތޫމް އާއި އަބޫދާބީގެ އަމީރު ޝައިޚް ޒައިދު ބިން ސުލްތާން އަލް ނަޙްޔާން ނުވަތަ ސިންގަޕޫރުގެ ލީ ކުއާން ޔޫ ފަދަ ތަރައްޤީގެ ބާނީއަކަށް ރައީސް ޔާމީނަށް ވެވިދާނެކަމަށް އެމަނިކުފާނުގެ އަރިހުގައި އުޅުއްވާ ބައެއް ބޭފުޅުންނަށް ހީފުޅުވިޔަސް، އެކަމެއް އެހެން ވާކަށް ނެތެވެ. އެޤައުމުގެ ވެރިންނާއި ކިތަންމެ ގާތް ގުޅުމެއް ބާއްވަން އުޅުއްވިޔަސް، އެޤައުމުތަކުގެ ވެރިން އެގެންނެވި ތަރައްޤީ ރައީސް ޔާމީނަށް ރާއްޖެއަށް ގެނެވިފައެއް ނެތެވެ. ކޮރަޕްޝަނަށް މަގުފަހިނުވާ ގޮތަށް ކުރިއަށް ގެންދެވި ޕްރޮޖެކްޓެއްގެ ވާހަކަ އަޑެއް ނީވެއެވެ. އަމިއްލަފުޅު އިސްނެންގެވުމަކަށް، ޗައިނާގެ ބެލްޓް އެންޑް ރޯޑް އިނީޝިއޭޓިވްގައި ނުހިމެނޭ ޕްރޮޖެކްޓެއް ހިންގެވިފައެއް ނެތެވެ. 

ދެން ވެރިކަމަށް ވަޑައިގަންނަވާ ބޭފުޅަކު ގެންނަވާނެ ތަރައްޤީއެއް ނެތްކަމަށް ރައްޔިތުންނަށް ވިސްނަވައިދެއްވުމަށް ޕީޕީއެމްގެ ބައެއް ބޭފުޅުން އުޅުއްވައެވެ. އެހެންނަމަވެސް ރައްޔިތުން އަދިވެސް އެދި ގޮވަނީ ތަރައްޤީއަށެވެ. 24 ގަޑިއިރުގެ ކަރަންޓަށެވެ. ރަށުބަންދުން ވީއްލި، ފަސޭހަ ރަހުމަތެއްގައި ކައިރި ރަށްރަށަށް ދަތުރުކުރުމަށެވެ. ރަށުގައި ތިބެގެން ބަލިތަކަށް ފަރުވާ ލިބި، މާދުރަށް ނުގޮސް ބޮޑެތި ބަލިތަކަށްވެސް ފަރުވާ ލިބުމަށެވެ. ކޯޓުތަކަކީ އިންސާފު ލިބޭނެ ތަނެއްކަމުގެ ކަށަވަރުކަން ލިބުމަށެވެ. 

ތަރައްޤީއަކީ ރައީސް ޔާމީންގެ ހަރުމުދަލެއް ނޫނެވެ. ދެން ވަޑައިގަންނަވާ ވެރިއަކު މާބޮޑަށްވެސް މިޤައުމަށް ތަރައްޤީ ގެންނަވަން ޖެހެއެވެ. 

އެންމެ ފަހުން އަޕްޑޭޓް ކުރީ: 1 މަސްކުރި | ރިވިއު ކުރީ: އަހްމަދު ސާއިފް ޝިޔާދް

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 9110099 ނަންބަރަށް ގުޅުއްވާ.


އެންމެ ފަހުގެ


މި ލިޔުން ކިޔާލުމުން


އަންތަރީސް ވެއްޖެ

އުފާ ވެއްޖެ

ދެރަ ވެއްޖެ

ރުޅި ގަދަ ވެއްޖެ

މޮޔަވެއްޖެ

ދެން އަތްޖަހާ


ކޮމެންޓް