ކާބުލް އަށް ދިން ހަމަލާތަކުގެ ޒިންމާ އައިއެސް އިން ނަގައިފި

އަފްޣާނިސްތާނުގެ ވެރިރަށް ކާބުލްގައި ދާދިފަހުން ދިން ދެ ހަމަލާއަކީ ހަނގުރާމަވެރި ޖަމާއަތެއް ކަމަށްވާ އިސްލާމިކް ސްޓޭޓް (އައިއެސް) އިން ދިން ހަމަލާ ކަމަށް އެޖަމާއަތުން ބުނެފިއެވެ. 

ބުދަ ދުވަހު އަފްޣާނިސްތާނުގެ ވެރިރަށް ކާބުލްގެ ޓިއުޝަން ސެންޓަރަކަށް ދިން ހަމަލާގައި 48 މީހަކު މަރުވެފައިވާއިރު، މަރުވެދިޔައީ ގިނައިން ކިޔަވާ ކުދިންނެވެ. އަދި ބުރާސްފަތި ދުވަހު ވަނީ އަފްޣާނިސްތާނުގެ އިންޓެލިޖެންސް ޚިދުމަތުގެ ޓްރެއިނިން ސެންޓަރަކަށްވެސް ހަމަލާދީފައެވެ. 

އައިއެސް އިން ބުނެފައި ވަނީ ބަޔާން ކުރެވުނު ދެހަމަލާ އަކީ އެ ޖަމާއަތުގެ "ކޮމާންޑޯ" އޮޕަރޭޝަނެއް ކަމަށެވެ. މިހަމަލާތަކާ ގުޅިގެން އަފްޣާނިސްތާނުގެ އޮފިޝަލުން ބުނެފައި ވަނީ ހަނގުރާމަވެރިންގެ ދެ މީހަކު މަރާލާފައިވާ ކަަމަށެވެ. ހަމަލާތަކުގެ ޒިންމާ އައިއެސް އިން ނަގާފައި ވަނީ އެ ޖަމާއަތުގެ މީޑިއާ އައުޓްލެޓް، އަމަގް މެދުވެރިކޮށެވެ. ބުރާސްފަތި ދުވަހު ދިން ހަމަލާތަކާ ބެހޭގޮތުން ހަނގުރާމަވެރިން ބުނެފައި ވަނީ 110 މީހުން މަރު ނޫނީ ޒަޚަމްވެފައިވާ ކަމަށެވެ. 

ހަނގުރާމަވެރި ޖަމާއަތްތަކުން ފާއިތުވެދިޔަ ދުވަސްތަކުގައި އަފްޣާނިސްތާނުގައި ހަމަލާތައް ދިނުން އިތުރުކޮށްފައިވާއިރު، ތާލިބާނުން ވަނީ އަފްޣާނިސްތާނުގެ ޣަޒްނީ އަށް ވަރުގަދަ ހަމަލާއެއް ދާދިފަހުން ދީފައެވެ. އޮފިޝަލުން ބުނެފައި ވަނީ ޣަޒްނީ އަށް ހަނގުރާމަވެރިން ދިން ހަމަލާތަކުގައި އަފްޣާނިސްތާނުގެ 100 ސިފައިން މަރުވެފައިވާ ކަމަށެވެ.