އެމެރިކާގެ ނުވަ ވަނަ މިޝަން ސަޕޯޓް ކޮމާންޑަރު، ޑިފެންސް މިނިސްޓަރާ ބައްދަލު ކުރައްވައިފި

އެމެރިކާގެ ނުވަ ވަނަ މިޝަން ސަޕޯޓް ކޮމާންޑަރ ބްރިގޭޑިއަރ ޖެނެރަލް ސްޓެފަން ކޫރްޑާ، ރާއްޖޭގެ ޑިފެންސް މިނިސްޓަރ އާދަން ޝަރީފް އުމަރުގެ އަރިހަށް އިހްތިރާމްގެ ޒިޔާރަތެއް ކުރައްވައިފި އެވެ.

ސްޓެފަން ކޫރްޑާގެ މި އިހުތިރާމްގެ ޒިޔާރަތަކީ އެމެރިކާ އަސްކަރިއްޔާ އާއި ދިވެހިރާއްޖޭގެ ގައުމީ ދިފާއީ ބާރާ ގުޅިގެން މާލޭގައި ކުރިއަށްގެންދިޔަ ލޮޖިސްޓުކް ސަބްޖެކްޓް މެޓަރ އެކްސްޕާޓް އެކްސްޗޭންޖު ޕްރޮގްރާމުގައި ބައިވެރިވެވަޑައިގަތުމަށް ރާއްޖެ ވަޑައިގެން އުޅުއްވާ ދަތުރެއްގަ އެވެ.

ބުރާސްފަތި ދުވަހު ހެނދުނު ޑިފެންސް މިނިސްޓްރީގައި ބޭއްވި އެ ބައްދަލުވުމުގައި، އެމެރިކާ އަސްކަރިއްޔާއާއި ދިވެހި އަސްކަރިއްޔާގެ ދެމެދުގައިވާ ގުޅުން އިތުރަށް ބަދަހިކުރެއްވުމާ ބެހޭގޮތުން ދެ ބޭފުޅުން ވަނީ މަޝްވަރާ ކުރައްވާފަ އެވެ.

މީގެ އިތުރުން، ލޮޖިސްޓިކް ޕްލެޓް ފޯމެއް ގާއިމުކުރުމަށްޓަކައި އެމެރިކާ އަސްކަރިއްޔާއާއި ދިވެހިރާއްޖޭގެ ގައުމީ ދިފާއީ ބާރުގެ ލޮޖިސްޓިކާ ގުޅޭ ދާއިރާތަކުގައި މަސައްކަތްކުރާ ސިފައިންގެ ތަޖުރިބާ ހިއްސާކުރުމަށް މާލޭގައި ކުރިއަށްދިޔަ ލޮޖިސްޓިކް ސަބްޖެކްޓް މެޓަރ އެކްސްޕާޓް އެކްސްޖޭންޖު ޕްރޮގްރާމާ ބެހޭގޮތުންވެސް ސްޓެފަން ކޫރްޑާ އާއި ޑިފެންސް މިނިސްޓަރު ޝަރީފްއާ ދެބޭފުޅުން ވަނީ މަޝްވަރާ ކުރައްވާފަ އެވެ.