ދިވެހިރާއްޖޭގައި އެންމެ އިތުބާރާއެކު ދެމެހެއްޓެނިވި ގޮތެެއްގައި ހިންގާ ޓްރެވަލް އެޖެންސީ ކުންފުނި، ކެޕިޓަލް ޓްރެވަލް އެންޑް ޓުއާރސް މޯލްޑިވްސް އެކުންފުނީގެ 35 ވަނަ އަހަރީ ދުވަސް ފާހާގަކޮށްފި އެވެ.

1990 ވަނަ އަހަރުން ފެށިގެން ރާއްޖޭގެ ފަތުރުވެރިކަމުގެ ދާއިރާ އަށް ހިދުމަތް ކުރަމުންދާ، ކެޕިޓަލް ޓްރެވަލް ގެ 35 ވަނަ އަހަރީ ދުވަސް ފާހަގަކުރުމަށް ބޭއްވި ޚާއްސަ ހަފްލާ ބާއްވާފައިވަނީ ހޯމަ ދުވަގެރޭ ހޮޓެލް ޖެން ގަ އެވެ.

މި ހަފްލާގައި އެކުންފުނީގެ މުވައްޒަފުންގެ އިތުރުން ރާއްޖޭގެ ފަތުރުވެރިކަމުގެ ދައިރާގައި ފާހަގަކޮށްލެވޭ ގިނަ ފަަރާތްތަކެއް ބައިވެރިވި އެވެ. ހަފްލާ ޝަރަފްވެރި ކޮށްދެއްވާފައިވަނީ ރާއްޖޭގެ ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެވެ. މީގެ އިތުރުން ރާއްޖޭގެ ފަތުރުވެރިކަމުގެ ވުޒާރާގެ ވަޒީރުކަން މީގެ ކުރިން ކުރައްވާފައިވާ ޑރ. މަޙްމޫދު ޝައުގީ އަދި ޑރ. ޢަބްދުﷲ މައުސޫމް މި ހަފްލާގައި ބައިވެރިވެލެއްވި އެވެ.

އަހަރީ ދުވަހުގެ ހާއްސަ ހަފްލާގައި ވަނީ ކެޕިޓަލް ޓްރެވަލްގެ 35 އަހަރުވީ ދިގު ދަތުރު އަދި މުސްތަގުބަލަށް އެ ކުންފުނި ކުރާ އުއްމީދުތައް ދައްކުވައިދޭ ހާއްސަ ވީޑިއޯ ޕްރެޒެންޓޭޝަނެއް ދައްކާލާފަ އެވެ. މި ހަފްލާގައިވަނީ ކެޕިޓަލް ޓްރެވަލް އިން ތަރައްގީކޮށްފައިވާ އަމިއްލަ ބުކިން އިންޖީނުގެ ޕްރިވިއު އެއް ދައްކާލާފަ އެވެ. މިއީ ކެޕިޓަލް ޓްރެވަލް އިން ޒަމާނީ ޓެކްނޮލޮޖީ އަށް އަހުލުވެރިވުމަށާއި ކަސްޓަމަރުންނަށް ހިދުމަތް ހޯދުމުގައި އިތުރު ފަސޭހަތަކެއް ހޯދައި ދިނުމަށް ތަރައްގީ ކުރި ބުކިން އިންޖީނެކެވެ.

މި ހަފްލާގައި ވާހަކަ ދައްކަމަވަމުން ކުންފުނީގެ ސީއީއޯ ޔޫސުފް ރިއްފަތު ވަނީ ކުންފުނީގެ ފުރަތަމަ ދުވަސްވަރުގެ ދިމާވި ގޮންޖެހުންތަކާއި، ހޯދާފައިވާ ފާހަގަކޮށްލެވޭ ކުރިއެރުންތަކާ ބެހޭ ގޮތުން ވާހަކަ ދައްކަވާފަ އެވެ.

ރިއްފަތު ވަނީ އިންސާނީ ވަސީލަތްތައް ތަރައްގީކުރުމާއި، ބައިނަލްއަގުވާމީ މާކެޓްގައި ރާއްޖޭގެ ފަތުރުވެރިކަން މާކެޓްކުރުމާއި، ރާއްޖެ އަކީ ދުނިޔޭގެ ފަތުރުވެރިކަމުގެ އެންމެ މަތީ މަންޒިލުގެ ގޮތުގައި ޕްރޮމޯޓް ކުރުމަށް ކުންފުނިން ކުރައްވާ މަސައްކަތްތަކަށް އަލިއަޅުއްވާލާފަ އެވެ. އަދި ކެޕިޓަލް ޓްރެވަލް އިން މިފަދަ ޚިދުމަތްތައް ކުރުމުގައި ކުރިޔަށް އޮތް އަހަރުތަކުގައި ވެސް ދެމިހުންނާނެ ކަމުގެ ޔަގީންކަން ސީއީއޯ ރިއްފަތު ވަނީ ދެއްވާފަ އެވެ.

ހަފްލާގައި ކެޕިޓަލް ޓްރެވަލް ގެ ޑިރެކްޓަރ އޮފް ބިޒްނަސް ޑިވެލޮޕްމެންޓް، ތިޒްކާ ރިއްފަތު ވަނީ 1990 ވަނަ އަހަރުން ފެށިގެން އާ މާކެޓްތަކަށް ރާއްޖެ ޕްރްމޯޓްކުރުމަށް އެ ކުންފުނިން ކޮށްފައިވާ މަސައްކަތްތަކުގެ ނަތީޖާ ވަރަށް ރަނގަޅު ކަމަށް ފާހަގަކުރައްވާފަ އެވެ. ވަކިން ހާއްސަކޮށް ޗައިނާ އަދި ސްޕެއިން ގެ ފަތުރުވެރިން ރާއްޖެ ގެނައުމަށް އެކުންފުނިން ކޮށްފައިވާ ކާމިޔާބު މަސައްކަތްތައް ތިޒްކާ ފާހަގަކުރެއްވި އެވެ.

ވަރަށް އާދައިގެ ގޮތަކަށް މީގެ 35 އަހަރު ކުރިން އުފެއްދި ކެޕިޓަލް ޓްރެވަލް އަކީ މިއަދު ރާއްޖޭގެ ޓޫރިޒަމް ދާއިރާގައި އެންމެ ނަން ހިނގާ އަދި އެންމެ ގިނަ ބައެއްގެ އިތުބާރު ލިބުފައިވާ ޓްރެވަލް އޮޕަރޭޓަރު ކަމަށް ގިނަ ބަޔަކު އެއްބަސްވެ އެވެ. ކެޕިޓަލް ގްރޫޕް އޮފް ކޮމްޕެނީޒްގެ ފައުންޑަރ ޔޫސުފް ރިއްފަތު އަކީ މޯލްޑިވްސް އެސޯސިއޭޝަން އޮފް ޓުއާރ އޮޕަރޭޓަރސް އެންޑް ޓްރެވަލް އޭޖެންޓްސް (މަޓަޓޯ) އަދި މޯލްޑިވްސް ޓްރެވަލް އެސޯސިއޭޝަން (އެމްޓީއޭ) ގެ ވެސް ފައުންޑިން މެމްބަރެކެވެ.