ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިން ޑިރެކްޓަރު އިބްރާހިމް ނަސްރީން އެ މަގާމުން އިސްތިއުފާ ދެއްވައިފ އެވެ.

ނަސްރީން އިސްތިއުފާ ދެއްވީ ހޮނިހިރު ދުވަހު ބޭއްވި ޕީއެސްއެމް ގެ ބޯޑު ބައްދަލުވުމުގެ ތެރެއިން ކަމަށް މައުލޫމާތު ލިބެ އެވެ.

އެއް އަހަރާއި ހަފްތާއެއްގެ މުއްދަތަށް ޕީއެސްއެމްގެ އެމްޑީގެ މަގާމުގައި ހުންނެވި ނަސްރީން އިސްތިއުފާ ދެއްވީ ސަރުކާރުގެ އެހެން މިނިސްޓްރީއަކުން ވަޒީފާ އެއް ލިބިވަޑައިގަތުމުން ކަމަށް ވެސް މައުލޫމާތު ލިބިފައިވެ އެވެ.

ނަސްރީނަކީ މިހާރުގެ ސަރުކާރުގައި ޕީއެސްއެމް އަށް އައްޔަން ކުރެއްވި ތިން ވަނަ އެމްޑީ އެވެ. މި ސަރުކާރު ވެރިކަމަށް އައުމަށް ފަހު އެ މަގާމުގައި ކުރިން ހުންނެވި ދެ ބޭފުޅުންނަކީ ޒީނާ ޒާހިރާއި މުހައްމަދު ސައީދެވެ. އެ ދެ ބޭފުޅުން ވެސް އެކި ސަބަބުތަކާ ހެދި ވަކި ހިސާބަކުން އެމްޑީގެ މަގާމުން އިސްތިއުފާ ދެއްވި އެވެ.

ނަސްރީން އަކީ ދައުލަތުގެ މީޑިއާގައި ދިގު ތަޖުރިބާ އެއް ލިބިފައިވާ ފަރާތެކެވެ. މީގެ 15 އަހަރު ކުރިން ދައުލަތުގެ މީޑިއާއާ ގުޅިވަޑައިގެން، އޭނާ ވަނީ އެ ކުންފުނީގެ ޗީފް ކޮމާޝަލް އޮފިސަރުގެ މަގާމާއި އީ-ކޮމާސްގެ ޑިރެކްޓަރުގެ މަގާމު ވެސް އަދާކުރައްވާފަ އެވެ.

ޕީއެސްއެމްގެ އެމްޑީގެ މަގާމަށް އައްޔަން ކުރެއްވުމުގެ ކުރިން އެންމެ ފަހުން ނަސްރީން ހުންނެވީ ޕީއެސްއެމްގެ ސޭލްސް އެންޑް މާކެޓިން ޑިރެކްޓަރުގެ މަގާމުގަ އެވެ.