ސަރުކާރުގެ ސިޔާސީ މަގާމުތައް މަދުކުރާނެ ކަމަށް އެތަކެއް ފަހަރު ވިދާޅުވެފައިވާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އަނެއްކާވެސް ޔޫތު މިނިސްޓްރީއަށް ޑެޕިއުޓީ މިނިސްޓަރަކު އައްޔަނު ކުރައްވައިފި އެވެ.

ޔޫތު މިނިސްޓްރީގެ ޑެޕިއުޓީ މިނިސްޓަރުކަމަށް ރައީސް މުއިއްޒު އައްޔަނު ކުރައްވާފައިވަނީ އަހުމަދު ޝަމްއޫން އެވެ. ޝަމްއޫން އަކީ ކުރީ ގެ ރައީސް އަބްދުﷲ ޔާމީން އަބްދުލްގައްޔޫމް ގެ ސަރުކާރުގައި ދެ މިނިސްޓްރީއެއްގެ ކޯޑިނޭޓަރުކަން ވެސް ކުރެއްވި ބޭފުޅެކެވެ. ޑެޕިއުޓީ މިނިސްޓަރެއްގެ މުސާރައަކީ މަހަކު 35،000 ރުފިޔާ އެވެ. މިދިޔަ ހޯމަ ދުވަހު ކުރެއްވި މި އައްޔަނު ކުރުމާ އެކު، ޔޫތު މިނިސްޓްރީގައި މިހާރު ފަސް ޑެޕިއުޓީ މިނިސްޓަރުން ތިއްބަވާނެ އެވެ.

ކުރިން ޕީޕީއެމް ގައި ވެސް މަސައްކަތްތަކެއް ކުރެއްވި ޝަމްއޫން، ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ސޮއިކުރެއްވީ 2018 ވަނަ އަހަރު އެވެ. ރައީސް ޑރ. މުހައްމަދު މުއިއްޒު މާލޭ ސިޓީ ކައުންސިލްގެ މޭޔަރު ކަމަށް ވާދަކުރެއްވި ކެމްޕޭނާއި، ރިޔާސީ އިންތިޚާބަށް ކުރެއްވި ކެމްޕޭނުގައި ވެސް ޝަމްއޫން ހަރަކާތްތެރިވެފައިވެ އެވެ.

މިދިޔަ އަހަރު ބޭއްވި ރައްޔިތުންގެ މަޖިލީހުގެ އިންތިޚާބުގައި ޝަމްއޫން މައްޗަންގޮޅި މެދު ދާއިރާގެ ޕީއެންސީގެ ޓިކެޓް ހޯދުމަށް ވާދަކުރެއްވި އެވެ. ނަމަވެސް އެ ޓިކެޓް އެނާއަށް ކާމިޔާބު ނުވި އެވެ.

މި ސަރުކާރުގައި ސިޔާސީ މަގާމުތައް 700 އަށް ވުރެ އިތުރު ނުކުރުމަކީ ރައީސް މުއިއްޒުގެ ރިޔާސީ ވައުދުފުޅެކެވެ. ރިޔާސީ ކެމްޕޭނުގައި ރައީސް މުއިއްޒު ވަނީ ސަރުކާރުގެ ހަރަދުތައް މަދުކުރައްވާނެ ކަމަށާއި، ސިޔާސީ މަގާމުތައް ކުޑަކުރައްވާނެ ކަމަށް ވައުދުވެވަޑައިގެންފަ އެވެ. ނަމަވެސް މިހާތަނަށް ފެންނަމުންދާ ތަސްވީރަކީ އެއާ ޚިލާފު ތަސްވީރެކެވެ.

ސަރުކާރުން މިދިޔަ ޖުލައި މަހު ހާމަކުރި ހިސާބުތަކުން އެނގޭ ގޮތުގައި، ސަރުކާރުގައި އޭރު ތިބީ 922 ސިޔާސީ މުވައްޒަފުންނެވެ. އޭގެ ތެރޭގައި ޑެޕިއުޓީ މިނިސްޓަރުންގެ ގޮތުގައި 216 ބޭފުޅުން ތިބި ކަމަށް އެ ހިސާބުތަކުން ދައްކައެވެ. މިހާރު އެ އަދަދު އެއަށްވުރެ އިތުރުވެފައިވާނެ ކަމަށް ބެލެވެ އެވެ. އިދިކޮޅު ފަރާތްތަކުން ތުހުމަތު ކުރައްވާ ގޮތުގައި މިސަރުކާރުގެ ސިޔާސީ މަގާމުތައް 3000 އަށް ވުރެ ގިނަ އެވެ.