މިނިވަން އިންސާފްވެރި އިންތިހާބަކަށް 2018 ގެ ރިޔާސީ އިންތިހާބް ނުވާނެ ކަމަށް ގަލޮޅު ދެކުނު ދާއިރާގެ ރައްޔިތުންގެ މަޖިލީހުގެ މެމްބަރު އަހުމަދު މަހުލޫފް ވިދާޅުވެއްޖެއެވެ.
ލަންކާގައި ހުންނަވައިގެން ރާއްޖެޓީވީއަށް މައުލޫމާތު ދެއްވަމުން މަހުލޫފް ވިދާޅުވީ ހުރިހާ ސިޔާސީ ޕާޓީތަކުގެ ލީޑަރުންނަން ބައިވެރިވެވޭ މިނިވަން އިންސާފުވެރި އިންތިހާބެއް 2018 ގައި ބޭއްވިއްޖެނަމަ 90 ޕަސެންޓަށް ވުރެ މަތިން ރައީސް ޔާމީން ބަލިކުރެވޭނެ ކަމަށެވެ. އިންތިހާބް ނުބާއްވަން ރައީސް ޔާމީނަން ކުރެވެން ހުރި ހުރިހާ ކަމެއް ކުރައްވާނެ ކަމަށާއި، ރިޔާސީ އިންތިޚާބަކީ މިނިވަން އިންސާފުވެރި އިންތިޚާބަކަށް ނުވާނެ ކަމަށް މަހުލޫފް ވިދާޅުވިއެވެ.
"މިނިވަން އިންސާފްވެރި ހުރިހާ ފަރާތަކަށް ބައިވެރިވެވޭ އިންތިހާބެއް ބޭއްވިއްޖެނަމަ، އަޅުގަނޑުމެން ރައީސް ޔާމީން ބަލިކުރާނަން 90 ޕަސެންޓަށް ވުރެ މަތިން. އެހެންނަމަވެސް ދިވެހި ރާއްޖޭގައި 2018 ވަނަ އަހަރު ބާއްވާ ރިޔާސީ އިންތިހާބަކީ މިނިވަން އިންސާފްވެރި އިންތިހާބަށް ނުވާނެ، އެއްވެސް ޝައްކެއް ނެތް" މަހުލޫފް ވިދާޅުވިއެވެ.
މަހުލޫފް ވިދާޅުވީ މިއަދު ގުޅިފައިވާ ސިޔާސީ ޕާޓީތަކުން ގޮންޖެހުންތަކާއި އެކު ކުރާ މަސައްކަތުގެ ނަތީޖާއަކަށް ވެގެންދާނީ ރައީސް ޔާމީންނަން އިންތިޚާބު ބާއްވަން މަޖުބޫރުވުން ކަމަށެވެ. އެހެންނަމަވެސް އެ އިންތިހާބުގެ ނަތީޖާ އޮޅުވާލުމަށް ސަރުކާރުން މަސައްކަތް ކުރައްވާނެކަން މަހުލޫފް ފާހަގަކުރިއެވެ.
"އަޅުގަނޑު ވަރަށް ސާފުކޮށް މި ދަންނަވަނީ، ރިޔާސީ އިންތިހާބު އޮންނާނެ، ބާއްވަން ޖެހޭނެ، އަދި އެކަމަކު އެމީހުންނަން އޮޅުވާލަން ކުރެވެން ހުރި ހުރިހާ ކަމެއް ކުރާނެ، އެކަމަކު ވެސް އަޅުގަނޑުމެން ބަލިކުރާނަން، ބަލިކުރާނީ ވެސް ތަފާތު ބޮޑުކޮށް" މަހުލޫފް ވިދާޅުވިއެވެ.
އެގޮތުން ނިމިގެން ދިޔަ ލޯކަލް ކައުންސިލް އިންތިހާބުގެ ތާރީހް ފަސްކުރި އުސޫލުން، ރިޔާސީ އިންތިހާބު ވެސް ފަސްކޮށްފާނެ ކަމަށް މަހުލޫފް ވިދާޅުވިއެވެ. ނުފޫޒު ބޭނުންކޮށްގެން އިންތިޚާބުގެ ނަތީޖާ ބަދަލުކުރުމަށާއި، އިންތިޚާބު ފަސްކުރުމަށް ރައީސް ޔާމީން ހިސާބުޖައްސަވާނަމަ، އެ ހެއްދެވެނީ ވަރަށް ބޮޑު ގޯހެއް ކަމަށް މަހުލޫފް ވިދާޅުވިއެވެ.
" ރައީސް ޔާމީނަން ހީފުޅުވެދާނެ ލޯކަލް ކައުންސިލް އިންތިޚާބު ފަސްކުރި ގޮތަށް އިންތިޚާބު ފަސްކުރެވިދާނެ އޭ، ތިމަންނައަށް ވޯޓު އޮޅުވާލެވިދާނެ އޭ، އެއީ ވަރަށް ނުބައިކޮށް ރައީސް ޔާމީން ހައްދަވާނެ ކަލްކިއުލޭޝަނެން" މަހުލޫފް ވިދާޅުވިއެވެ.
މަހުލޫފް ވިދާޅުވީ ސަރުކާރުން އިންތިހާބަށް ނުފޫޒު ފޯރުވިއަސް، ބޮޑު ތަފާތަކުން ރައީސް ޔާމީން ބަލިކުރައްވާނެ ކަމަށެވެ.
