ޔޫއެސް އޯޕަން ޓެނިސް ޗެމްޕިއަންޝިޕުގައި ޒުވާން ޓެނިސް ކުޅުންތެރިޔާ ޝަޕަވަލޯވް މޮޅުވިއިރު އެލެކްޒެންޑާ ޒަވަރޭވް މުބާރާތުން ކަޓައިފިއެވެ.

ފިރިހެން ސިންގަލްސް އިވެންޓުގެ ގިނަ މެޗުތަކެއް ވާރޭގެ ސަބަބުން ލަސްކުރެވިގެން ދިޔައިރު މި ދެ ކުޅުންތެރިންގެ މެޗުތަށް ކުޅެވުނީ ބުދަ ބުރާސްފަތި ދުވަހުއެވެ.

ކެނެޑާގެ ޒުވާން ޓެނިސް ކުޅުންތެރިޔާ ޑެނިސް ޝަޕަވަލޯވް ތިންވަން ބުރަށް ދަތުރުކުރީ މުބާރާތުގެ އަށް ވަނައަށް ސީޑު ކުރެވިފައިވާ ފްރާންސްގެ ޖޯ ވިލްފްރީޑް ސޮންގާ ބަލިކުރުމަށް ފަހުއެވެ. ޝަޕަވަލޯވް މި މެޗު ކާމިޔާބުކުރީ ސީދާ ތިން ސެޓުންނެވެ. އެގޮތުން އޭނާ މި މެޗުގެ ސެޓުތަށް ގެންގޮސްފައިވަނީ 6-4، 6-4 އަދި 7-6 އަކުންނެވެ.

މިއީ 18 އަހަރުގެ ޝަޕަވަލޯވް ޔޫެއެސް އޯޕަންގައި ވާދަކުރާ ފުރަތަމަ ފަހަރެވެ. އޭނާ ވަނީ މިއަަހަރު އޭޓީޕީ ވޯލްޑް ޓުއާގައި ދުނިޔޭގެ ރޭންކިންގެ އެއްވަނައިގައި ރޭންކް ކުރެވިފައިވާ ސްޕެއިންގެ ރަފައޭލް ނަދާލްވެސް ބަލިކޮށްފައެވެ. ތިންވަނަ ބުރުގައި ޝަޕަވަލޯވް ބައްދަލު ކުރާނީ އިނގިރޭސިވިލާތުގެ ކައިލް އެޑްމަންޑާއެވެ.

ޔޫއެސް އޯޕަންގެ ހަތަރު ވަނަ ސީޑު ކަމަށްވާ ޖަރުމަނުގެ އެލެކްޒެންޑާ ޒަވަރޭވް ވަނީ މުބާރާތުން ކަޓާފައެވެ. އޭނާ މި މުބާރާތުން ކަޓާފައިވަނީ ކްރޮއޭޝިއާގެ ބޯރިން ކޮރިޗް އަތުން ތިން ސެޓު އެއް ސެޓުން ބަލިވެގެންނެވެ. ފުރަތަމަ ސެޓު 6-3 އަކުން ޒަވަރޭވް ގެންދިޔަ ނަމަވެސް ކޮރިޗްވަނީ ފަހު ތިން ސެޓު 7-5، 7-6 އަދި 7-6 އަކުން ގެންގޮސްފައެވެ.

މިއަހަރުގެ އޭޓީޕީ ވޯލްޑް ޓުއާގައި ޒަވަރޭވް ފަސް މުބާރާތް ކާމިޔާބު ކުރިނަމަވެސް އޭނާއަށް އެއްވެސް ގްރޭންޑް ސްލޭމެއްގެ ގަދަ އަށަކަށް ދަތުރު ކުރެވިފައެއް ނުވެއެވެ. ޒަވަރޭވް ވަނީ މިއަހަރުގެ ކެނެޑާ އޯޕަންގެ ފައިނަލްގައި ސުވިޒަލޭންޑުގެ ރޯޖާ ފެޑެރާ ވެސް ބަލިކޮށްފައެވެ.

ފިރިހެން ސިންގަލްސްގެ ތިންވަނަ ބުރުން ޖާގަ ހޯދި އިތުރު ކުޅުންތެރިންގެ ތެރޭގައި ކްރޮއޭޝިއާގެ މަރިން ސިލްޗްއާ ޖަރުމަނުގެ މިޝްކާ ޒަވަރޭވްއާ އެމެރިކާގެ ޖޯން އިސްނާ އަދި މުބާރާތުގެ ހަތް ވަނައަށް ސީޑު ކުރެވިފައިވާ ބަލްގޭރިއާގެ ގްރިގޯ ޑިމިޓްރޯވް ހިމެނެއެވެ.

ޔޫއެސް އޯޕަންގެ ފިރިހެން ސިންގަލްސް އިވެންޓުގެ ޗެމްޕިއަންކަން މިދިޔަ އަހަރު ހޯދާފައިވަނީ ސުވިޒަލޭންޑުގެ ސްޓަން ވަަވަރިންކާއެވެ.